Billarda e teatro para o 28 e 29 de setembro

O Colectivo Buril finaliza un intenso mes de setembro no que tiveron lugar as III Xornadas de Historia Local e un concerto solidario pola Sanidade Pública. O próximo fin de semana haberá sesión dupla, con actividades programadas tanto para o sábado como para o domingo, pechando a programación de verán e dando xa entrada á programación teatral de outono.

O sábado 28 terá lugar o tradicional Aberto do Bonito, torneo de billarda do que se celebra a súa quinta edición. O Aberto, proba puntuable para a Liga Nacional de Billarda (LNB), terá lugar a partir das 16:00 horas na explanda do Porto de Burela. As persoas interesadas en participar poderán anotarse previamente no enderezo ccburil@gmail.com ou ben poderán facelo o mesmo día presentándose no lugar do torneo entre as 16:00 e 16:15 h. Haberá trofeos para as persoas participantes e un bonito fresco para o gañador ou gañadora deste V Aberto do Bonito. Ao finalizar o Aberto, terá lugar un concerto no Centro Social Xebra (antigo bar A Figueira) a cargo dos grupos Komandante e Ex Tensión Agraria, e proxectarase o audiovisual De Burela a Cabo Verde (O Grande Estalo).

Xa na xornada do domingo, dará comezo a programación teatral do Buril para este outono, coa compañía Alentía Teatro, de Palas de Rei, que porá en escena a peza teatral Lambetadas de Fantasía, ás 18:00 horas, no auditorio da Casa da Cultura. Esta función forma parte do Circuíto Buxiganga 2013, vai dirixida a un público infantil e familiar e terá entrada gratuíta.

Na primeira semana de outubro desenvolveranse as XIV Xornadas Teatrais do Buril, que terán lugar os días 3, 4, 5 e 6 de outubro e que serán apresentadas aos medios nos próximos días. Para rematar, o día 18 de outubro, pecharase este ciclo teatral de outono organizado polo Buril, da man da compañía Do Miolo e Cía., coa obra Non son D’acó (nin D’acolá), tamén dentro do proxecto teatral Buxiganga.

Alentía Teatro

Palas de Rei

ALENTÍA TEATRO naceu no ano 2005, co obxectivo principal de achegarlles o teatro a todos os públicos a través dunha perspectiva lúdica e didáctica.

Para captar a súa atención, trátanse temas próximos á súa realidade cotiá desde unha perspectiva cómica e crítica como, por exemplo, as posibilidades da internet; o uso responsable dos móbiles; ipods; a problemática das relacións sentimentais; o machismo; o mundo dos discapacitados; a agresividade lingüística e a violencia na mocidade; a influencia nas novas xeracións dos medios de comunicación... Toda esta temática enfócase dun xeito interactivo, pois en moitos momentos da función a activa participación do público converterao en protagonista e provocará momentos de catarse colectiva.

Nestes cinco anos de existencia, ALENTÍA TEATRO presentou os seus espectáculos nun amplo número de escenarios da xeografía galega e visitou os de varias comunidades autónomas, convidados por outras asociacións e colectivos. Achegouse, tamén, ao público doutros países en colaboración con ONGs como Meniños e Solidariedade Internacional ou Amarante.

Lambetadas de fantasía (público infantil e familiar)

Sinopse

Espectáculo conformado por cinco historias plenas de fantasía, creatividade, sorpresas, personaxes de contos, series de debuxos animados, humor...

A través dunha viaxe polo universo literario dos contos, os protagonistas desta historia atoparanse con dragóns, meigas, faraóns, trolls e outros moitos seres fantásticos creados polo público asistente á peza, a través de exercicios de improvisación.

En Lambetadas de fantasía, deféndese tamén o xogo como medio útil de enfrontar realidades adversas; como método de aprendizaxe e como carreiro para medrar rodeado dun universo de harmonía, ledicia e benestar. Esta obra teatral nace, na súa maior parte do traballo, cos nenos e as nenas do Orfanato de Amantan de Cuzco (Perú).

Unha peza que traballa valores como a solidariedade, o compañeirismo, o respecto polo medio ambiente, a cultura da paz, etc. Todo isto será realizado sempre baixo un prisma cómico e reflexivo. 

III Xornadas de História Local de Burela

Os vindeiros 12, 13 e 14 de setembro terán lugar en Burela as III Xornadas de Historia Local. O Colectivo Cultural Buril aposta por consolidar esta cita anual en torno á historia local que nacía en 2011 e que se ven celebrando desde entón de forma continuada. Estas xornadas constitúen unha oportunidade non só para coñecer aspectos destacados no decorrer da historia local, senón que tamén estimulan a realización de estudos e traballos de investigación sobre a nosa historia.

O estudo, difusión e posta en valor da historia de Burela han de servir para preservar a memoria da nosa vila e situármonos no contexto histórico, social e cultural da Galiza, pois non se pode entender a historia local como un todo uniforme e autónomo, isolado do seu entorno máis próximo e da realidade que constituímos como Pobo. Neste sentido, existe unha clara vontade por rachar con localismos estériles que asentan na exaltación do propio fronte ao alleo, procurando resaltar aspectos que destacan precisamente por ser comúns a outras entidades ou ben aqueles que teñen valor como obxecto de estudo por si propios.

Por outra banda, as xornadas tamén desenvolven unha importante función social, pois conseguen achegar o mundo da historia a moitos veciños e veciñas, rompendo deste xeito coa erudición na que a maioría das veces se desenvolven este tipo de estudos, facilitando o coñecemento da historia xeral a través da historia máis próxima a nós.

PROGRAMA DAS III XORNADAS DE HISTORIA LOCAL DE BURELA.

Cantares de cego e música popular na tradición oral. Mini e Mero

Xoves, 12 de setembro, ás 20:30 horas no Salón de Conferencias

As Xornadas darán comezo cunha palestra-concerto a cargo de Xosé Luís Rivas Cruz e Baldomero Iglesias Dobarrio, coñecidos popularmente como Mini e Mero, músicos, poetas e mestres investigadores do folklore e a cultura tradicionais galegos, membros fundadores do histórico grupo Fuxan os Ventos e actuais compoñentes do grupo A Quenlla.

Ademais da súa produción discográfica con estes grupos, teñen participado noutros discos de música galega, obras teatrais e publicado diversos libros. Destaca o seu labor de recolla de contos, lendas, coplas, cantares de cego… O seu arquivo sonoro foi cedido ao Museo do Pobo Galego para a súa dixitalización e incorporación ao Arquivo do Patrimonio Oral da Identidade. En 2009 foilles concedido por unanimidade o Pedrón de Ouro como recoñecemento á súa traxectoria no campo da investigación musical durante os últimos 40 anos.

Neste primeiro día das Xornadas, os dous históricos músicos interpretarán cantigas de cego referidas á nosa zona así como cantares característicos da tradición popular que se interpretaron nas aldeas e vilas galegas principalmente na primeira metade do século XX.

Burela no contexto dos castros costeiros da Mariña. Luís Cordeiro Maañón

Venres, 13 de setembro, ás 20:30 horas no Salón de Conferencias

O arqueólogo e investigador focego Luís Cordeiro impartirá unha conferencia sobre os castros da “rasa costeira”, sobre os que ten desenvolvido distintos traballos arqueolóxicos. Cordeiro conta cun importante número de publicacións e traballos de campo na área arqueolóxica, entre os que destacan a escavación do Castro das Grovas en Ribadeo ou da Catedral de San Martiño de Mondoñedo. Recentemente presentou na Universiade de Vigo a súa tese de doutoramento baixo o título “Os castros costeiros na Mariña de Lugo”, traballo que significa un importante paso na investigación da cultura e do período castrexo, porque nesta investigación aparecen novos castros que até a data eran descoñecidos e ficaban sen catalogar e este traballo explica perfectamente a sociedade, a forma de vida e o mundo castrexo como fenómeno complexo escapando da anécdota histórica.

Visita guiada ao arquivo da Confraría de Pescadores de Burela

Sábado, 14 de setembro, ás 11:00 horas na Confraría (Porto de Burela)

Desde 1923, ano no que se constituíu o Pósito de Pescadores, o arquivo da Confraría de Burela foi xerando a documentación que nos permite coñecer as orixes e evolución da institución que hoxe coñecemos. As funcións máis importantes das Confrarías eran a asistencia social aos socios, a ordenación da pesca, a venda do peixe e as melloras nas embarcacións, funcións que se reflecten claramente na documentación deste arquivo.

A exposición estrutúrase en catro eixos: A constitución da Confraría, regulamentos e estatutos; O labor social; As embarcacións; e a pesca. A visita estará guiada pola actual arquiveira da Confraría, Judit Fernández Gómez.

*Para esta actividade é preciso anotarse previamente para organizar correctamente a visita. Poden contactar connosco a través do correo ccburil@gmail.com ou ben nos teléfonos 616-995-013 (mañás) e 616-473-366 (tardes).

Onde está o mago Antón?

O Colectivo Cultural Buril trae a Burela o espectáculo do Mago Antón o próximo venres, 2 de agosto. A actuación do famoso mago galego terá lugar ás 21 horas na Casa da Cultura de Burela e leva por título “Onde está o Mago Antón?”.

O espectáculo vense celebrando ao longo de toda a provincia de Lugo, ao abeiro dun proxecto da área de Cultura da Deputación Provincial de Lugo, e está dirixido a todos os públicos de todas as idades, desenvolvéndose en diferentes espazos: cafeterías, restaurantes, colexios, librerías, pubs, centros comerciais, hospitais, empresas, hoteis, etc…

No seu espectáculo o Mago Antón contará con máis de douscentos efectos: un peixe chamado Cousteau, o xogo da rá, fruteiro, punto de encontro, Galiza sempre, baralla conxelada, a dada de tute, o xogo da moa, carta no teito, o xogo da bolsa e o ovo etc…

​Durante a tarde do xoves, día 1, o Mago Antón estará de visita por Burela, facendo microactuacións en diversos espazos públicos con dúas finalidades: a primeira e levar a maxia a espazos e a públicos onde a maxia non ten ningunha presenza. E a segunda ten como finalidade mobilizar a eses públicos para convidalos a asistir ao espectáculo final que terá lugar o venres, ás 21:00 horas no auditorio da Casa de Cultura de Burela.​

​

Desde o Colectivo Cultural Buril convidamos a pequenos e maiores a disfrutar deste grande espectáculo e de dous días cheos de maxia

BIC para as pinturas da Vila do Médio

O Buril solicitará á Dirección Xeral de Patrimonio, dependente da Consellaría de Cultura da Xunta da Galiza, a declaración de Ben de Interese Cultural en calidade de monumento, para as pinturas e igrexa da Vila do Medio. Do mesmo xeito, tamén solicitará ao Concello de Burela que trate este asunto no próximo pleno municipal, ao entender que se trata dunha cuestión de grande interese para Burela.

As pinturas murais da Igrexa da Vila do Medio constitúen unha obra de grande importancia histórica, artística e patrimonial, non só para Burela, senón tamén para a arte galega en xeral. Estas pinturas veñen padecendo un importante proceso de deterioro desde que foron descobertas a principios dos anos 70 do pasado século, presentando actualmente un estado de conservación que urxe unha rápida actuación para garantir a súa preservación ao longo do tempo, así como para a súa posta en valor como parte fundamental da nosa história artística e cultural.

O Buril, traballa na promoción e defensa da cultura galega en todas as súas manifestacións, desenvolvendo ao longo dos seus case 30 anos de vida distintas actividades encamiñadas a preservar e pór en valor o noso patrimónico cultural, facendo unha aposta nestes últimos anos polo estudo e difusión da história local, con especial atención a aqueles aspectos máis destacados de Burela e da Mariña.

O pasado ano 2012, dentro das II Xornadas de História Local de Burela, realizamos unha visita guiada ás pinturas da Vila do Medio, a cargo da historiadora da arte Lucia Bouza, onde puidemos constatar in situ o precario estado de conservación que presenta esta “pequena xoia” da pintura medieval galega, sendo algunha das escenas pictóricas practicamente irrecuperábel. 

Co fin de pór remedio a esta situación que pon en perigo a preservación destas pinturas, o Buril presentará solicitude ante a Consellaría de Cultura, Educación e Ordenación Universitaria da Xunta de Galiza, para que as pinturas e a igrexa da Vila do Medio sexan declaradas Ben de Interese Cultural, de acordo coa Lei 8/1995, de 30 de outrubro, do Patromonio Cultural de Galiza.

O Buril tamén presentará solicitude no Concello de Burela para que este asunto sexa levado ao próximo pleno municipal e solicitará o apoio dos tres grupos políticos con representación no pleno, para reforzar a solicitude presentada na propia Consellaría e poder acadar deste xeito a declaración de Ben de Interese Cultural para a igrexa e pinturas da Vila do Medio.

Paralelamente a esta solicitude desde o Buril impulsaremos distintas actividades relacionadas coas pinturas da Vila do Medio e a súa declaración BIC, para dar a coñecer esta iniciativa entres os distintos sectores sociais de Burela. Todas estas iniciativas encádranse dentro dunha serie de actividades que se programarán con motivo do 30 aniversario do Colectivo Cultura Buril.

III Maratón de Lectura

III Maratón de Lectura de Burela

Martes 23 de Abril do 2013. Salón de plenos do Concello

O próximo martes, terza-feira, día 23 de abril, no salón de plenos do Concello, terá lugar o III Maratón de Lectura de Burela. Esta actividade, organizada polo Buil, nacía hai dous anos na nosa vila e tén por finalidade principal promover a lectura en lingua galega.

Este ano cúmprense 150 anos da publicación de Cantares Galegos, obra fundacional da literatura galega contemporánea e símbolo do Rexurdimento da literatura e cultura galegas. Desde o Colectivo Buril queremos dedicar o III Maratón de Lectura a Rosalía de Castro, sumándonos deste xeito ás distintas actividades que se están a desenvolver en numerosas vilas e cidades galegas, promovidas principalmente pola Asociación de Escritoras e Escritores en Lingua Galega (AELG), pola Fundación Rosalía e por distintas asociacións culturais de base.

Ao igual que na edición previa do maratón, a lectura prolongarase ao longo de todo o día e os textos a ler serán fragmentos da obra rosaliana ou ben textos de outros autores e autoras dedicados á poeta de Padrón. A xornada de mañá

dará comezo ás

10:00

coas

 lecturas dos alumnos e alumnas dos centros educativos de primaria e secundaria de Burela

, CEIP Os Castros, CEIP Vista Alegre, IES Monte Castelo e IES Perdouro

. Pola tarde, desde as 16:00, participarán distintos colectivos

e entidades

de Burel

a, estando xa confirmada a presenza

da

asociación Camiña

,

Axuda ao enfermo mental "A Mariña", 

Fundación Eu Son, Burela FS,

Clube de Baloncesto, SCR Ledicia, 

Amigas e Amigos

 da Banda Música de Burela,

AMAJAZZ, 

Centro San Aníbal, asociación Vagalume

, Observatorio da Mariña pola Igualdade, Clube de Lectura

... así co

m

o distintas

persoas

que participarán a título

 individual.

 

Desde o colectivo Buril a

gradecemos

o

 interese mostrado

por todos e todas as participantes, que fan posible este maratón de lectura en Burela. Aproveitamos tamén para convidar a todas as persoas a asistir ao maratón e disfrutar da lectura de textos de Rosalía de Castro ao longo de todo o día.

Servando Trigo na lembranza

Tras a triste noticia do seu inesperado pasamento, o pasado sábado, 12 de xaneiro, despedíamos a Servando, veciño de Burela e quen foi durante moito tempo activo colaborador do noso colectivo.

Servando Trigo Carreiras, natural do Valadouro, instalouse en Burela sendo un rapaz, tras unha breve estancia en Barcelona. Foi por tanto, como moitos e moitas de nós, un burelao de adopción, que veu na procura de traballo e ficou aquí para sempre. Axiña comezou a traballar como carpinteiro e estando xa asentado na nosa vila, exerceu de “auténtico burelao”, participando activamente e colaborando con distintas entidades asociativas de tipo cultural e deportivo.

Unha das entidades nas que máis activamente participou foi na S.D. Burela, da que foi directivo durante varios anos. Era frecuente velo na billeteira do campo da Marosa, así como nos desprazamentos co equipo a outras localidades, a onde acudía frecuentemente como delegado. Como membro da directiva da S.D. Burela tamén formou parte da comisión de festas, axudando en todo canto podía.

Mais o seu traballo asociativo non se cinguiu exclusivamente á S.D. Burela. Colaborou tamén co Clube de Balonmán, especialmente nas primeiras festas do Monte Castelo, cando a festa era organizada polo equipo. Froito do seu gusto pola cociña, tamén participou en distintas actividades gastronómicas. Tanto asaba sardiñas na propia Romaría do Monte Castelo, como bonito na Festa do Bonito, organizada pola S.C.R. Ledicia, festa da que chegou a ser nomeado “Asador Maior”.

Outra das actividades nas que tamén se involucrou desinteresadamente foi no entroido local, especialmente no Enterro da Sardiña organizado polo C.C. Buril. A sardiña do propio enterro foi realizada desde o comezo, alá polos 80 e ata 2012 pola carpintaría O Campón, taller fundado por Servando e Urbano Bouza a mediados dos 80 e no que Servando traballou ata a súa xubilación hai só uns anos. Tanto os dous socios como os empregados do taller, non só se involucraban na construción e decoración da sardiña, senón que tamén participaban na comitiva que acompañaba á “defunta sardiña” pola rúas de Burela, como membros da “corporación municipal”. No vídeo documental “O Entroido na Memoria”, realizado polo Buril en 2001 e dixitalizado o pasado ano, podemos velos na mencionada comitiva.

Estas son algunhas das actividades máis destacadas nas que participou, mais con certeza que participou en moitas outras das que non temos coñecemento. Desde o Buril, queremos con esta breve lembranza facer unha humilde e sentida homenaxe a Servando, aínda que a verdadeira homenaxe, a que el merece, faise no día a día, dando continuidade ao traballo asociativo ao que el dedicou tanto esforzo e dedicación. Servando é todo un exemplo para o asociacionismo de base e no Buril tentaremos seguir o guieiro que el e moitos e moitas outras encetaron hai xa uns anos na nosa vila.

En Burela, a 18 de xaneiro de 2012.

Xunta Rexedora do C.C. Buril

Magosto e Des-Concerto Expansivo en Burela na XORNADA pola DIGNIDADE

O pasado sábado tivo lugar un Des-Concerto Expansivo promovido pola Plataforma socio-cultural Burla Negra, que se desenvolveu de xeito simultáneo en numerosas vilas e cidades galegas, coincidindo co 10º aniversário da “Marea da Dignidade”, que ao berro de “Nunca Máis”, enchía as rúas de Compostela o 1 de decembro de 2002.

Desde o Colectivo Buril quixemos sumar-nos a esta iniciativa e por iso organizamos unha Xornada pola Dignidade que comezou cun magosto e unha chourizada realizada diante do noso local social, na Praza de Abastos de Burela. Soci@s do colectivo asaron castañas ao xeito tradicional que foron repartidas gratuitamente entre todas as persoas asistentes.

Ás 22:30 horas, daba comezo o Des-Concerto Expansivo da man da agrupación de latin-jazz Marosa Jazz Project (MJP) que interpretou algúns dos standars de jazz máis coñecidos. A seguir, o quinteto burelao Medio Quinhón fixo un percorrido por distintas pezas da música tradicional e tamén por algunha composición do seu repertorio.

Antes de dar paso ás outras agrupacións , a presidenta do Buril, Rosana Valle, deu leitura ao Manifesto contra o Silencio, de Manuel Rivas, que foi lido simultaneamente nas distintas vilas que se sumaron ao Des-Concerto Expansivo e que reproducimos abaixo.

A seguinte agrupación en actuar foi o grupo local Skolhma, que interpretaron temas propios e tamén fixeron versións de Patti Smith, Lou Reed, Terbutalina... Xa para finalizar, o grupo mariñao de hardcore The Broken Revenge presentou os seus temas nunha potente posta en escea, deixando un moi bo sabor de boca entre todas e todos os asistentes.

Manifesto contra o Silencio

Manuel Rivas

Atención. En todas as esquinas da Vía Sacra de Neón hai hoxe un concerto expansivo.
Emitimos acordes contra a adversidade.
Emitimos contra a mercadoría perigosa da mentira.
Emitimos contra a maquinaria pesada da propaganda.
Emitimos contra o rexistro bruto da incompetencia.
Emitimos contra un goberno rancoroso, feo, ameazante.
Emitimos na onda libre dos cans da noite,
na alegre radiofonía secreta das sereas
e na frecuencia do corvo de Allan Poe
que peteira en morse a clave que nos une: Nunca Máis!
Rescatamos do naufraxio unha orgullosa bandeira ennegrecida.
Rescatamos os instrumentos de soñar.
Rescatamos os tesouros roubados.
Rescatamos un mascato chamado liberdade.
Rescatamos o cormorán cristado da dignidade.
Rescatamos as cancións na fonoteca invencible do mar.
E rescataremos a verdade.
A verdade sairá a flote no país das barcas de pedra.
Facemos probas de son coa esperanza.
Atención.
Estamos a emitir ex conxuros solidarios.
Estamos a confortar o noso corazón
e a facer máis forte ao noso pobo.
Porque Galicia non ten prezo. Xa non ten prezo.
Facemos probas de son coa liberdade.
Un, dous, tres! Probando! Nunca Máis!